(सिमि प्रा. सन्त बहादुर तमु)

      तमुमेल त्हानसे ह्रवसेव म्हि चिवा डा. हर्क ल्हेँगे तमुई लिसोवे तमु म्हि चिवा प्रा. सन्त बहादुर तमु सुदे त्हारे ङिनीप्रे आरे । चु ह्यावै भदोगई १, २०६६ र न्हागरवे ११ ह्रावर मेडिकियर अस्पतालर सिव गो । 
      चु ओँसो प्रा. तमु ङ्हेउलोन मृगौलई वेथई वेल्ले नसी उपचार ललै खलो । न्हेपाल ह्युललइ सुदे चइदिव म्हि प्रा. सन्त बहादुर तमु छले सीमई त्हानलनई सैँ आतोसुम् । 
      स्याङ्गजा जिल्ला सिरसीकोटरवे आपा तेज बहादुर तमु नी आमा पवित्र तमुई कोखाईटो १९३९ जनवरी ९ तारिखर भारतरवे कलकत्तर योँव गो । आपा भारतरवे आर्मीर मुलो । प्रा. तमु मिजासिलो धै मिँ धुमा शान्त स्वभावरवे मुलो खाव्लै सुदे आख्रोँव मिर झोँसी आम्लोव मुलो । समाजलई ओँसो भोवर छ्याँव ताँ झगो विमुलो । तियाँ छाव म्हि ङि त्हानलई वाथेसी ह्यामई वेल्ले सै क्रोसुमु ।

      चत्हिरी नासर खेव्धीँ  आरेमै खेल सुदे आयोसी आपानी भारतरवे देहरादुनर खेवर ह्या्ई । देहरादुनरवे गुरुनानक इन्‍स्‍टिच्‍युट कलेजर खेई धै खेव सुदे वेल्ले छ्याँव मुवै लम्दरी च कलेजइ छात्रवृत्ति विई । प्रा. तमुई फुटबल, हक्की नी बास्केटबल छ्यन्ले क्ल्योमुलो । 
      प्रा. तमुई न्हेपालरवे आदिवासी जनजाति नी तमु समाजै ल्हागीर छ्याँव के जगो लैमो । तमु प्ये ल्हु संघरवे आजीवन सदस्य सुदे मुवे प्रा. तमु त्हानसे ओँसो न्हेपाल सरकारै आदिवासी जनजातिमेल सूचिकृत लव त्हिरी प्रा. सन्त बहादुर तमुई संयोजकर ५९ आदिवासी जनजाति झगोँल पहिचान लव केर थेव योगदान विइमो । आदिवासी जनजाति उत्थान राष्ट्रिय प्रतिष्ठानई स्थापना लवै ल्हागीर सुदे थेव योगदान विई विस्याँ २०६० सालर च प्रचिष्ठानरवे कार्यकारी अध्यक्ष सुदे तई ।   
२०५१ सालइले २०५६ सालसम्मन तमु बौद्ध सेवा समिति न्हेपालरवे ओँसोवे महासचिवई के लसी तमु समाजई ल्हागीर ल्हेँय के झगो लई विस्याँ २०६३ सालइले तमु बौद्ध सेवा समितिरवे त्हानसे थेव सल्लाहकारई पद किसी समितिलई छ्याव छ्याव ताँ नी सुझाव विवै खलो । छनलसी २०६० सालरवे तमुमे थेव सम्मेलनई वनेदिव तमु (गुरुङ) राष्ट्रिय परिषदरवे अध्यक्ष पदरी खइर २०६४ साल सम्मन त्हान तमु समाजमेलई घ्री लव नी तमु प्ये ताँ ल्हु ताँई संरक्षणई ल्हागिर छ्याँव के लई । 
      सिमि प्रा. तमु तमुमेल मात्रन आङी त्हान न्हेपाली मेल सुदे मुलो । आइजीडी, सेडा धुम थेव थेव संस्थारवे क्रथेव सुदे तईर छ्याँव के झगों ललई खवा त्हानलई थामो । त्हारे बन्दिव छार न्हेपाल नी तमु ह्युलई ल्हागिर सिमि प्रा. सन्त बहादुर तमुल वेल्ले थेव के चइदिमला । त्हारे ङ्योई छाव म्हि योवर मुस्कील मो । 
     सिमि प्रा. सन्त बहादुर तमुई आत्मई शान्ति योँदीगे, क्ल्हेसोँदी प्‍ह्रेसोँदीई कोखिर क्ल्ह्यो योंरिगे विसी ङ्यो तमु प्ये ल्हु संघइटो श्रद्धाञ्‍जली मो ।